Sekretariati i Etikës ka rrëzuar kërkesën e PD për masa disiplinore ndaj kreut të grupit të PS, Taulant Balla.
Grupi parlamentar i Partisë Demokratike tre ditë më parë kishte depozituar një kërkesë për përjashtimin e tij nga punimet e Kuvendit për një periudhë 30-ditore.
Në kërkesë, demokratët pretendonin se Balla ka përdorur gjuhë joparlamentare dhe fyese ndaj opozitës gjatë zhvillimit të seancave plenare. Balla iu drejtua deputetëve demokratë me fjalën “zagar” duke ndezur debate në Kuvend.
Por kolegët socialistë të Ballës nuk i kanë marrë për bazë këto pretendime duke mos marrë asnjë masë ndaj tij.
Çfarë tha Balla në Kuvend?
Kreu i grupit parlamentar të PS, Taulant Balla iu drejtua opozitës duke iu thënë që nëse flisni për lepuj duhet të përmendin edhe zagarë.
“Njëri i bie patkoit, e tjetri gozhdës. Asnjeri nuk ka sqaruar se përse kjo çështje duhet të ikë nga rendi i ditës. Dëgjova batuta, tallje, njëri fliste për lepuj, por po hytë te lepujt duhet të flisni edhe për zagarët. Se lepurin në pritë e nxjerr zagari. Po i hytë këtij diskutimi bujrum se do t’ju lexoj unë listën.”, tha ai.
