Drejtuesi i Departamentit të Sigurisë në Partinë Demokratike, Enkelejd Alibeaj tha se “një nga peshqit e mëdhenj të krimit, është liruar nga burgu”.
Në një dalje për mediat, Alibeaj deklaroi se miku i Edi Ramës dhe Blendi Klosit, Durim Keçi, është liruar sepse i ka shërbyer kryeministrit në çdo zgjedhje.
“Një tjetër kriminel i rrezikshëm është jashtë dyerve të burgut. Durim Keçi, një nga peshqit e krimit, mik i Edi Ramës dhe Blendi Klosit, është liruar nga burgu. Me shumë gjasë, ai nuk do të ekstradohet në Itali, ku është dënuar për trafik drogë dhe prostitucioni.
Që kur Edi Rama emëroi Prokurorin e Përgjithshëm pa vetting dhe në kundërshtim me kushtetutën:
-Saimir Tahirit iu kthye pasaporta dhe ai mund të lëvizë I lirë kudo ku ka fshehur paratë e fituara nga trafiku I drogës.
-Orest Sota u lirua nga burgu,megjithëse u kap në mashtrim për burimin e 863 mijë eurove dhe përdorimin e tyre.
-Trafikantëve të kokainës së Xibrakës iu ul dënimi dhe prokuroria nuk e ankimoi vendimin.
-Balilajve iu rikthye nga Gjykata leja për policinë private, që do të thotë një ushtri e armatosur me njerëz në mbrojtje të Kelment Balilit”, tha Alibeaj.
