Jozefina Topalli, Majlinda Bregu, Ridvan Bode, Eduard Halimi dhe të tjerë kanë debatuar me Bashën për krizën ku është përfshirë vendi dhe PD
Pas video-konferencës me dy zyrtarët e lartë të Brukselit, Joseph Daul dhe Johanes Hahn, është rikthyer me debate të forta mbledhja e grupit parlamentar të PD-së. Deputetët kundërshtarë të Bashës, kanë kërkuar që Basha, i cili ndërmori i vetëm rrugën e bojkotit të gjejë menjëherë zgjdhje për të nxjerrë PD-në nga kriza. “Unë besoj që ti do të gjesh një mënyrë për të dalë nga kjo situatë. Rruga e duhur për Partinë Demokratike është që të futet në zgjedhje. Bojkotimi i zgjedhjeve është i paprecedentë”, ka thënë Jozefina Topalli. Ndërsa Majlinda Bregu ka theksuar se: Të lësh 600 mijë votues të PD-së pa votë, ky është genocid”. Në përgjigje të tyre, Basha tha se që PD të hyjë në zgjedhje duhet të ketë minimumine garancisë që paketa e dhënë nga ndërkomëtarët të zbatohet. Pjesë e debatit janë bërë edhe deputetë të tjerë si Ridvan Bode i cili githashtu ka hedhur alarmin për krizën ku është përfshirë vendi dhe PD. Eduard Halimi është shprehur gjithashtu me shqetësim lidhur me krizën e PD-së duke lënë të kuptohet se bojkoti nuk është rruga e PD-së.
Debati erdhi pasi dy zyrtarët e lartë nuk lanë asnjë rrugë tjetër për PD-në veçse hyrjen në zgjedhjet e 18 qershorit. Nisur nga ky qëndrim, ku përfshihej edhe mesazhi i Daul e Hahn drejtuar Bashës: Ke përgjegjësi personale për bojkotin, deputetët e PD-së i janë drejtuar pikërisht Bashës për të ndryshuar qëndrim e për të hyrë në zgjedhje.
