Pas 24 korrikut, Bujar Nishani do të jetë një qytetar i angazhuar në politikë. Kjo është përgjigja që ai vetë e dha sonte në intervistë me gazetarin Enkel Demi, në emisionin “Fol me Mua Fol me Ata” në TVSH. I pyetur për rikthimin e tij në politikë pas përfundimit të mandatit si president, Nishani është shprehur se nuk e sheh veten në moshë pensioni, ndërsa për nga natyra ai tha se është mjaft aktiv dhe nuk e mendon dot veten pasiv në raport me aktivizimin në politikë. “Kurrë mos thuaj kurrë” është shprehja që ka përdorur presidenti për t’ iu përgjgijur pyetjes në se do të jetë sërish deputet në kuvendin e Shqipërisë. Megjithatë ai tha se ka plot mënyra për tu aktivizuar në jetën shoqërore dhe politike. I pyetur në se do të kthehet për të rimarrë teserën PD-së të cilën e kishte dorëzuar kur mori postin e presidentit, Nishani është tha se është një e drejtë që i takon gjithkujt. Ai vlerësoi Ilir Metën si personalitetin që do ta pasojë në këtë detyrë duke e cilësuar zgjedhjen e Ilir Metës plotësisht legjitime dhe kushtetuese. Për Bujar Nishanin, përvoja politike e Ilir Metës është një faktor i rëdnësishëm për tu vlerësuar si një figurë në krye të shtetit shqiptar.
Nishani foli për një sërë çështjesh të tjera që kanë lidhje me raportetet e tij me mazhorancën për katër nga pesë vitet e qëndrimit në krye të shtetit, duke veçuar acarimet e herpashershme me kreun e qeverisë e mazhorancën për çështje të ndryshme.
Nishani foli edhe për situatën në Maqedoni ku shprehu keqardhje për dhunën e ndodhur pak ditë më parë në parlamentin e Maqedonisë. Nga ana tjetër ai vlerësoi si një arritje të madhe zgjedhjen e një shqiptari në krye të parlamentit të Maqedonisë.
Nishani foli edhe për vizitën e tij në Arabinë Saudite dhe gjithë ritualin që ai respektoi gjatë vizitës në vendet e shenjta atje. Nishani ka sqaruar të gjithë ata që komentuan praktikimin e riteve fetare në Arabinë Saudite, duke kujtuar se të njëjtën sjellje kishte praktikuar edhe në vende të tjera si Vatikani apo Jeruzalemi.
