Kampi i MEK, në Manëz i është nënshtruar masave të rrepta sigurie pas paralajmërimit të ambasadës së SHBA-ve për një sulm të mundshëm terrorist nga Irani. Mësohet se çdo mjet që i drejtohet kampit i nënshtrohet një kontrolli të imtësishëm me detektorë. Ndërkaq përfaqësuesit e opozitës iraniane në kamp, nuk heqin dorë nga konferenca e paralajmëruar në këtë kamp, pavarësisht se sot vendosi të shtyjë datën e saj.
Në një komunikatë të shpërndarë për mediat nga muxhahedinët thuhet se fashizmi fetar iranian në 40 vitet e fundit nuk ka reshtur së bëri çdo gjë kundër tyre, nga masakra e të burgosurve te terrorizmi dhe vrasjet. “Shpërthimi i vitit 2018 në Villepinte nga diplomatët në shërbim është një shembull. Prandaj, kërcënimet e regjimit fetar nuk janë të reja për ne. Të gjithë janë informuar për kërcënimin e paralajmëruar nga ambasada amerikane. Vitin e kaluar morën pjesë online 50 mijë nga 105 vende. Këtë vit kushdo që dëshiron mund të marrë pjesë online dhe konferenca do të mbahet gjithsesi”, thuhet në reagimin e zyrtarëve të kampit Ashraf 3 në Manëz të Durrësit.
Kujtojmë që mbrëmjen e djeshme ambasada e SHBA-ve paralajmëroi se ka një kërcënim për një sulm të mundshëm terrorist në samitin e planifikuar në kampin e MEK, në Manzë.
Një ditë më pas muxhahedinët njoftuan se Samiti Botëror i Iranit të Lirë, i planifikuar për datat 23 dhe 24 korrik në Manëz është vendosur të shtyhet.
