I pesti në listën e Vlorës pas grekut Vangjel Dule i cili është i treti në listën e PD-së. Ky është vlerësimi që i bën Lulzim Basha votës së Çamërisë
Dashamir Tahiri është emiri i pestë në listën e kandidatëve për deputet të PD-së në Vlorë. Në këtë pozicion në listë ka pak gjasa që Dashamir Tahiri të bëhet deputet e për pasojë i bie që ai të punojë për të bindur komunitetin e Çamërisë në qarkun e Vlorës që t’i japin vota Vangjel Dules së partisë së minoritetit grek, që të bëhet deputet në Kuvend.
Të tilla paradokse ka prodhuar lista e Partisë Demokratike. Në zgjedhjet e e vitit 2013, PD bashkë me PDIU-në e aleatët e tjerë, mori katër mandate. Ka pak gjasa që numri i votave të jetë rritur për këto katër vite të opozitës më të dobët që ka njohur ndonjëherë Partia Demokratike në 27 vjet. Ndërkohë që cilësia e listës së kandidatëve për deputet pritet të ketë një ndikim deciziv në votën e elektoratit në zgjedhjet e 25 qershorit. Ndëshkimet pritet t’i vijnë PD-së nga shumë anë, nga mbështetësit e 24 deputetëve të PD-së që janë lënë në mënyrë të paprecedentë jashtë listës së kandidatëve për deputetë, marrëveshja me Ramën që përbën një tjetër kosto për Partinë Demokratike e të tjera. Janë një sërë arsyesh që të çojnë në parashikimin e një numri të vogël mandatesh në të gjitha qarqet por në mënyrë të veçantë në qarkun e Vlorës. Kështu që i pesti në këtë listë, dy vende poshtë Vangjel Dules, Dashamir Tahiri do t’i duhet të punojë për votat e partisë greke në parlamentin shqiptar.
Ka pak gjasa që komuniteti i Çamërisë në këtë qark të pranojë që vota e tyre të shkojë për llogari të Vangjel Dules. Është e rëndë që Dashamir Tahiri të shkojë t’ia kërkojë këtë popullsisë së Çamërisë, pra t’i kërkojë që të votojnë për partinë greke, të atyre që vranë pa mëshirë më mijëra burra, gra e fëmijë të Çamërisë. Në fund të fundit, Lulzim Basha nuk duhet kurrsesi ta kishte vënë në këtë sprovë një një njeri që po i shitet komunitetit si i Çamërisë ndërkohë që i kërkon atij të sigurojë vota për grekët. Kjo është fyerje e rëndë për popullsinë e Çamërisë dhe aq më e rëndë për respektin për gjakun e mijëra fëmijëve, grave e burrave të Çamërisë të vrarë dhunshëm gjatë genocidit grek. Është kaq i padenjë ky vend i pestë i Dashamir Tahirit, pas Vangjel Dules që është i treti në listën e Vlorës. Në fund të fundit, ky është vlerësimi që paska Lulzim Basha për popullsinë e Çamërisë.
