Pak para mbledhjes me grupin parlamentar të PS, kryeministri Edi Rama ka zhvilluar një takim me ish homologun e tij britanik, Tony Blair. Ende nuk ka detaje nga takimi apo se çfarë mund të jetë diskutuar, por duhet thënë se ky takim vjen në një moment të vështirë për PS, pas skandalit me inceneratorët dhe shpalljen non grata të Aqip Rakipit, djali i të cilit doli deputet në listat e PS më 25 prill.
Nuk dihet nëse Blair ka ardhur të mbështesë Ramën, pasi të dy gëzojnë një marrëdhënie të mirë me njëri-tjetrin, dhe eksponentë të afërt të ish-kryeministrit britanik njihen për aftësitë e tyre të komunikimit dhe përballjen me skandalet, dhe siç dihet jo pak herë kanë “kontribuuar” në PS.
Kujtojmë se, rreth 10:00 të paradites së sotme, në ambientet e kryesisë së Kuvendit do të hyjnë një e nga një deputetët socialistë, të cilët do të kenë me vete dhe një fletë me 3 emrat e tyre si kandidatë për postin e presidentit.
Në mbledhjen e sotme do të jetë i pranishëm dhe vetë kryeministri Rama, ku ndër të tjera do të diskutohet edhe për fatin e Orlando Rakipit, pas shpalljes non grata të të atit.
