Raportohet se gjatë mesditës në qendër të Barcelonës në Spanjë ka ndodhur një sulm, ku një furgon është përplasur me dhjetëra njerëz ku të paktën 13 persona kanë mbetur të vdekur dhe dhjetëra të tjerë të plagosur.
Pas përplasjes së ndodhur në sheshin ikonë “Las Ramblas” të frekuentuar shumë nga turistët, mbi 11 milionë në vit, zona është rrethuar nga forcat e sigurisë.
Por ngjarja është në vazhdim, pasi autori është larguar në këmbë pas sulmit, ndërsa raportohet se në një lokal, dy persona të armatosur po mbajnë disa pengje.
Policia është përpjekur të negociojë më pengmarrësit por akoma nuk ka mundur të arrihet një marrëveshje për lirimin e pengjeve.
Në këtë zonë kishte shumë njerëz, shumë familje, pasi është një nga vendet më të vizituara në Barcelonë.
Linjat e metrosë u mbyllën menjëherë, sikurse edhe dyqanet përreth zonës, ndërsa këmbësorët vraponin nga të katër anët në kërkim të strehimeve të sigurta, ndërsa dëshmitarët thonë se kanë dëgjuar edhe të shtëna armësh.
