Pas kaq ditësh që qëndronin grumbull në vende të hapura, është gjetur “zgjidhja” për pulat e ngordhura në Durrës. Burime bëjnë me dije se, mijëra pula të ngordhura nga gripi i shpendëve janë groposur ditën e sotme. Mësohet se në Shijak janë hapur 2 gropa, në një zonë e cila ndodhet larg zonave të banuara.
Zëvendës-ministrja e Bujqësisë, Ermira Gjeci më herët në një deklaratë për mediat njoftoi se pulat e ngordhura ishin groposur, por pa thënë emrin. “Të gjithë shpendët janë groposur. Vazhdon gjurmimi dhe testimi në pulari. Thirrje të gjithë fermerëve që në rast dyshimi për shpendët duhet të kontaktojnë me numrin jeshil të autoritetit kombëtar të vetenarisë”, tha Gjeci. Kujtojmë që prej disa ditësh gripi i shpendëve po bën “kërdinë” në pularitë e Durrësit, ku thuhet se kanë ngordhur rreth 1 milionë pula.
