Policia e Kosovës në orët e para të mëngjesit ka filluar të mobilizohet për protestën e cila do të mbahet sot para Kuvendit dhe qeverisë së Kosovës, protestë kjo e thirrur nga shoqatat e dala nga lufta e Ushtrisë Çlirimtare të Kosovës.
Tashmë pranë objekteve të institucioneve, si Kuvendi i Kosovës dhe qeveria e Kosovës ka një numër të shtuar të zyrtarëve policorë.
E njëjta gjë dhe në sheshet kryesore të Prishtinës. Sipas procedurave, policia ka njoftuar se do të marrë masa dhe do të shtojë aktivitetet operative para, gjatë dhe pas përfundimit të protestës.
Policia e Kosovës thotë se ka bërë përgatitjet e nevojshme operacionale policore me qëllim të ruajtjes së rendit dhe qetësisë publike si dhe mbarëvajtjes së protestës së lajmëruar për sot, sipas ligjit mbi tubimet publike nga veteranët e UÇK-së.
Policia bëri thirrje që protesta të zhvillohet e qetë duke respektuar ligjet e vendit dhe që kërkesat të shpalosin në mënyrë demokratike e ligjore.
