Kryeministri Edi Rama ka vendosur të përdorë sërish propagandën si mjetin më efikas për tu përballur me protestat masive të qytetarëve që po trondisin themelet e qeverisë Rama. I frikësuar nga vala e protestave që ka përfshirë në të gjithë vendin, Rama ka nisur një bashkëbisedim me një grup punonjësish për të prezantuar paketën e rezistencës sociale.
Për të larguar vëmendjen nga protestat, Rama tha se nisur nga prilli, paga minimale do të rritet në 320 mijë lekë të vjetra, ndërsa shtoi se në fund të mandatit do të arrijë 400 mijë lekë të vjetra.
“Është bërë si modë këtu që pagat janë 200 mijë lekë, jo është 300 mijë lekë. Do ta rrisim çdo vit, në fund të mandatit do të bëjmë që të mos ketë pagë nën 400 mijë lekë. Me këto masa kemi 56% të të punësuarve që s’paguajnë asnjë taksë. Do flas dhe për energjinë është pjesa më e rëndë dhe do ishte më katastrofike. Goditja e krizës mbi faturën e energjisë është në 5, 6 dhe ka arritur deri në 7 herë. Kur të shkoni në shtëpi hidhini një sy faturës së energjisë, shumëzojeni me 7, aq është çmimi sot, është njësoj si produktet tuaja që të shumëzohen me 7”, tha Rama.
Ky takim vjen një ditë pasi prezantoi Paketën e Rezistencës Sociale me 7 pika për t’iu gjendur pranë qytetarëve për rritjen e çmimeve dhe një orë para nisjes së protestës masive përpara Kryeministrisë.
