Pak para nisjes së Kongresit të Partisë Socialiste, kryeministri Edi Rama i ka uruar qytetarëve nga selia rozë një fundjave të mbarë, ku ajo që bie në sy është se pas tij është varur një foto e ish-kreut historik të PS-së, Fatos Nano.
Duke kërkuar ndjesë për mënyrën se si po i zgjon qytetarët, Rama thotë se sot PS e ka ditë kongresi ndërsa të tjerët ditë pushimi.
“Mirëmëngjes dhe me ndjesën që po ju zgjoj si gogol në këtë ditë pushimi, teksa PS e ka ditë kongresi, uroj për të gjithë ju një fundjavë të qetë!”, shkruan Rama.
Partia Socialiste do të mbledhë sot Kongresin ku do të vendosen objektivat për garat e ardhshme elektorale, dhe ndryshe nga herët e tjera do të jetë i pozicionuar në Bulevard dhe jo në Pallatin e Kongreseve.
Punimet do nisin rreth orës 09:30 ku përgjatë Bulevardit, në dy sheshe, do të jenë 5 panele, ku ministra, deputetë dhe grupe interesi do të diskutojnë për energjinë, politikën e jashtme dhe çështje të tjera. Kjo pjesë e planifikuar për ndërveprim më qytetarë, zgjatë 2 orë, për t’u zhvendosur më pas në këto ambiente te salla e Pallatit të Kongreseve, e për tu fokusuar tek punët e partisë, ndërsa fjalën përmbyllëse do ta thotë kryeministri Rama.
