I njohur si një ndër “paganinët” e botës, 21 vjeçari shkodran Elvin Hoxha, i cili ka pushtuar skenat botërore me talentin e tij të veçantë, kësaj here shkëlqen me performancën e tij edhe në Teatrin Mbretëror të Spanjës.
Elvin Hoxha, talenti shqiptar i violinës, i cili cilësohet nga kritika botërore si “Paganini i ri” ka dhënë performancën e radhës të nivelit të lartë në një nga skenat më të njohura botërore. Në Teatrin Mbretëror të Spanjës, 21 vjeçari mbajti një koncert solo nën drejtimin e tenorit dhe muzikantit të madh të kalibrit botëror, Placido Domingo.
Aktiviteti është mbajtur nën kujdesin e Mbretëreshës Sofia, e cila personalisht ka vlerësuar performancën e “Paganinit shqiptar”.
Elvini cilësohet si një nga dhjetë violinistët më të mirë botërorë, duke i dhuruar shqiptarëve natyrisht mirënjohjen dhe emrin e mirë të genit të tij.
Ambasadori shqiptar shkruan në postimet e tij që fatkeqësisht vendi i tij i origjinës, Shqipëria nuk ia ka shpërblyer deri tani, duke e mbajtur larg vëmendjes këtë djalë shkodran, për të cilin flet gjithë bota, natyrisht ajo e elitës artistike.
“Performancë mbresëlënëse e violinistit shqiptar Elvin Hoxha në Teatrin Mbretëror te Madrid–it, nën drejtimin e tenorit Placido Domingo dhe kujdesin e Mbretëreshës Sofia”, shkruan ambasadori Ridi Kurtezi.
https://www.facebook.com/narmina.ganiyeva.7/videos/1428719650524216/
Elvini është djali i dy artistëve talentuar: Hajredin Hoxhës dhe Narmina Ganyiev. Të dy janë artistë në Filarmoninë Kombëtare të Ankarasë.
Hajredini-Dini, siç i thërrasin, është një shkodran 24 karatësh që shumë vite më parë u ftua nga kolegët turq që të luante në Ankara dhe ata nuk e lanë më të kthehej.
Aty u dashurua dhe u martua me Narminën, një artiste nga Azerbaxhani dhe kështu u bënë pjesë në grupin ndërkombëtar të artistëve të elitës kulturore të Turqisë, e cila jep koncerte në të gjithë këndet e globit.
Hajredin Hoxha është pjesë e një familjeje të njohur qytetare dhe intelektuale të Shkodrës, nga ku kanë dalë artistë të njohur të arteve vizuale, por edhe pedagogë shkencash dhe muzikantë.
Dini dhe bashkëshortja e tij, Narmina e kanë ndjekur Elvinin që në vogëli duke e shoqëruar në skenat e të gjithë botës, ku Hoxha i Shkodrës ka lënë nam prej vitesh.
Në të gjitha skenat “Paganini shkodran” ka tronditur publikun kulturor dhe ka marrë kritika pozitive nga media kulturore. Por, askush nuk e ka ftuar nga vendi i tij, pikërisht për ta treguar që e kemi tonin këtë artist të jashtëzakonshëm.
