Zëvendëskryeministri i Kosovës, Behgjet Pacolli e ka ftuar presidentin e Serbisë, Aleksandër Vuçiç që mos të luajë rolin e molerit mes lindjes dhe perëndimit, por të kthehet në tavolinën e dialogut, ku ka thënë se po i presin me platformë.
Me anë të një statusi në Facebook, Pacolli shkruan se presidenti i Serbisë, Vuçiç duhet ta kuptojë se Serbia nuk mund të bëhet pykë në marrëdhëniet strategjike dhe të përhershme mes Shteteve të Bashkuara të Amerikës dhe Republikës së Kosovës.
“Zotri Vuçiç e din fare mirë se në bisedime shkohet me platformë të qartë. Serbia nuk duhet të luhatet e kurthuruar në lojën e saj mes lindjes dhe perëndimit por duhet të ketë një platformë për bisedimet e ardhshme. E siguroj Vucicin që asnjë paqe e qëndrueshme dhe afatgjatë nuk mund të ndërtohet pa gjykimin e krimeve, prandaj në funksion të kësaj duhet të ketë një gjykatë e cila do të merrej me përgjegjësinë kriminale të Serbisë ndaj shqiptarëve të Kosovës. Rajoni duhet të pastrohet nga krimi dhe kriminelët që shëtisin të lirë gjithandej në Serbi e rajon”, tha Pacolli.
