Kreu i LZHK-së, Dashamir Shehi, ka kritikuar ashpër qeverinë për mënyrën se si po menaxhohet procesi i integrimit në Bashkimin Europian, duke e cilësuar situatën si një dështim të thellë institucional.
Në deklaratat e tij, Shehi vuri në pikëpyetje vetë funksionimin e shtetit shqiptar. “Ne s’kemi shtet… këtu duhet rindërtuar shteti shqiptar”, u shpreh ai, duke krahasuar Shqipërinë me vendet e Europës Lindore që, sipas tij, kanë pasur institucione funksionale.
Shehi theksoi se integrimi në BE nuk duhet parë vetëm si përfitim ekonomik, por si një proces për ndërtimin e institucioneve dhe forcimin e shtetit ligjor.
Ai akuzoi drejtpërdrejt kryeministrin Rama lidhur me mënyrën e qeverisjes. “I erdhi në dorë shteti dhe e ka bërë më rrumpallë se ai që shan”, deklaroi Shehi, duke shtuar se mungesa e kontrollit ka favorizuar korrupsionin dhe abuzimin me fondet publike.
Sipas tij, anëtarësimi në BE do të sillte më shumë standarde dhe kontroll mbi institucionet. “Po të kishim qenë në Europë… nuk do lejonin të vjedhin kaq shumë”, tha Shehi.
Shehi e cilësoi procesin e integrimit si një premtim të parealizuar për qytetarët. “Europa ka ngelur ky mirazhi… si gjithë mirazhet, largohet”, u shpreh kreu i LZHK, duke kritikuar fokusin e qeverisë te propaganda në vend të reformave konkrete.
Ai ngriti shqetësime për mungesën e barazisë para ligjit dhe theksoi se pa ndërtimin e një shteti funksional dhe respektimin e rregullave, integrimi në Bashkimin Europian mbetet i paarritshëm.
“Nuk është i barabartë para ligjit… karrierën e bëjnë ata që janë me Edi Ramën”, deklaroi Shehi.
Po ashtu, Sheh, ka ngritur shqetësime të forta për gjendjen e demokracisë dhe funksionimin e opozitës në vend.
I ftuar në emisionin “Off the Record”, ai u shpreh se Shqipëria rrezikon të rrëshqasë në modele të vendeve jo demokratike si Bjelloruesia.
“Kam frikë se po mbërrijmë në nivelin e Bjellorusisë, Azerbajxhanit apo Rusisë. Atje nuk ka rotacion real pushteti dhe protestat janë pothuajse të papërfillshme”, tha ai, duke theksuar se kjo lidhet edhe me trashëgiminë postkomuniste të vendit.
Sipas Shehit, një nga problemet kryesore mbetet mungesa e frymëzimit dhe rinovimit brenda opozitës.
“Opozita nuk inspiron më, sepse janë po të njëjtët njerëz. Nuk mund të kërkosh mbështetje duke u rikthyer për herë të tretë apo të katërt me të njëjtin grup dhe të njëjtat ide”, u shpreh ai.
Ai theksoi se për të fituar zgjedhjet, opozita duhet të prodhojë lidership të ri dhe alternativa të reja politike.
“Nëse opozita do të sjellë figura të reja dhe teza të reja, jam i bindur që zgjedhjet e ardhshme mund t’i fitojë. Por nëse kjo mbetet një përplasje ‘ndërmarrjesh’, atëherë qeveria ka avantazhin e pushtetit dhe të burimeve”, deklaroi Shehi.
Kreu i LZHK-së u ndal edhe te sistemi politik dhe zgjedhor në vend, duke kujtuar se ai është produkt i marrëveshjeve të mëparshme mes palëve politike.
“Marrëveshja e vitit 2008 prodhoi këtë kushtetutë, këtë sistem zgjedhor dhe këtë ndarje administrative. Ky është një sistem që e kanë ndërtuar vetë dhe tani duhet të përballen me pasojat e tij”, përfundoi Shehi.
