Një operacion antidrogë është organizuar gjatë orëve të natës dhe në mëngjes. Më shumë se 16 tonë kanabis janë sekuestruar në qytete të ndryshme të Shqipërisë dhe në pranga janë vënë disa persona. Në lidhje me këtë operacion ka reaguar edhe ministri i Brendshëm, Dritan Demiraj.
Statusi i ministrit Demiraj në Facebook:
Përgëzoj Policinë e Shtetit për vazhdimësinë e Operacioneve në mbarë vendin, për luftën pa kompromis kundër kultivimit dhe trafikimit të Kanabisit.
Kapja dhe asgjësimi i sasive të grumbulluara nga viti kaluar është prioritet mbi prioritetet. Suksesi i sotëm i sekuestrimit të shumë tonelatave kanabis në Vlorë dhe mbarë Shqiperinë do të jetë modeli i punës tonë deri në pastrimin e plotë dhe kontrollin e territorit.
Siguroj të gjithë efektivët e përkushtuar të Policisë së Shtetit se do të kenë mbëeshtetjen e plotë të Ministrit të Punëve të Brendshme për arritjen e objektivave strategjike për heqjen e Shqipërisë nga harta e trafikut ndërkombëtar të drogave.
