Kryetari i Partisë Demokratike, Sali Berisha nga foltorja e Kuvendit hodhi akuza në drejtim të qeverisë dhe të ministrave, duke thënë se gjatë gjithë viteve në pushtet vetëm kanë vjedhur.
Ish-kryeministri u ndal edhe tek vjedhje me bitcoin, duke thënë se Amant Josifi ka bërë kërdinë në vendet e Evropës dhe tani është dërguar në Dubai nga Olsi Rama, vëllai i kryeministrit.
“Keni vjedhur sepse në një rast unik në botë, një kompani të cilës i janë arrestuar dhjetëra hajdutë. Vazhdon të marrë çdo ditë 300 mijë euro, çdo javë 1 mln euro vetëm se është kompania e Edi Ramës. Kurrë nuk mund të ndodhte dhe Skapi i partisë nuk guxon ta bllokojë dhe konfiskojë. Nuk guxon të ndërpresë vjedhjen e Ramës dhe klanit të tij me djegësit.
Keni vjedhur botën, 2.2 mld janë vjedhur me bitcoin nga ortaku i Olsi Ramës, Amant Josifi. Bën kërdinë në Spanjë dhe e përcollët njëlloj. Olsi Rama e përcolli në Dubai, Olsi Rama e përcolli Genti Xhixhon në Kubë me makinën e tij, padronin e Xibrakës.
Pse nuk rrinë këtu më thuaj pak? Ku janë? E tmerrshme, nga zonja janë transformuar në Manon Lescaut, të pamëshirë, se ajo ishte romantike kurse këto nuk ngopen nga asgjë”, tha Berisha.
