Organizata e Kombeve të Bashkuara ka bërë të ditur numri i emigrantëve pa dokumenta që humbën jetën në përpjekje për të hyrë në Europë nëpërmjet Mesdheut ka arritur në 5000.
Statistikat e fundit të nxjerra nga agjencia e refugjatëve të OKB-së, raportojnë edhe për 100 të tjerë të mbytur pasi u nisën për në Itali me gomone. Viktimat janë shkaktuar për shkak të motit të keq, mbingarkesës së anijeve, ose për shkak të defekteve, tha një zëdhënës i OKB-së.
Zëdhënësi William Spindler tha se numri i vdekjeve ishte alarmues, dhe praktikat e kontrabandistëve për të dërguar mijëra emigrantë në të njëjtën kohë, e bën më të vështirë punën e ekipeve të shpëtimit për t’i shpëtuar të gjithë. Rreth 36 mijë emigrantë hynë në Europë nga deti këtë vit, me shumicën e tyre që mbërrijnë në Itali dhe Greqi, tha Organizata e Emigracionit IOM.
