Presidenti i Shteteve të Bashkuara, Barack Obama, ka thënë se homologu i tij rus, Vladimir Putin, e sheh unitetin e Evropës si kërcënim dhe po përpiqet ta minojë atë.
Në një intervistë për televizionin CBS News, Obama ka përmendur krizën me emigrantët si shembull.
“Presioni që bën mbi politikat e Evropës, mënyra se si avancon nacionalizmin e ekstremit të djathtë dhe shkalla me të cilën kërcënon shpërbërjen e Bashkimit Evropian, në disa raste shfrytëzohen nga dikush si zoti Putin”, ka thënë Obama.
Obama ka thënë se ka bërë përpjekje t’ia bëjë të qartë liderit rus se NATO dhe BE-ja nuk janë kërcënime.
“I kam thënë se një Evropë e fuqishme, e bashkuar, që punon me një Rusi të fuqishme, është receta e duhur. Deri më tani, nuk është bindur”, ka thënë Obama.
Presidenti amerikan i ka bërë këto komente pasi ka përfunduar vizitën në Evropë.
Të hënën, gjatë një fjalimi në Hanover të Gjermanisë, Obama i ka bërë thirrje Evropës që të ruajë unitetin e saj politik dhe të forcojë kontributin në mbrojtjen kolektive të kontinentit.
“Shtetet e Bashkuara dhe e gjithë bota ka nevojë për një Evropë të fuqishme, të begatë, demokratike dhe të Bashkuar”, ka thënë Obama.
