Presidenti i Shteteve të Bashkuara, Barack Obama, ka thënë se koalicioni ndërkombëtar që lufton Shtetin Islamik (IS) në Siri dhe Irak e ka detyruar grupin ekstremist të kalojë në mbrojtje.
“Sot, në Siri dhe në Irak, Shteti Islamik është në defensivë.
Koalicioni ynë prej 66 anëtarësh, përfshirë partnerët arabë, është në ofensivë.
Kemi marrë vrull dhe synojmë ta mbajmë këtë vrull”, ka thënë Obama pas takimit me këshilltarët e sigurisë kombëtare në Agjencinë Qendrore të Inteligjencës.
Koalicioni që udhëheq SHBA-ja ka kryer mbi 11,500 sulme ajrore kundër objektivave të Shtetit Islamik në Siri dhe Irak.
Obama ka thënë se Shtetet e Bashkuara do të vazhdojnë të sulmojnë udhëheqësit e grupit ekstremist.
“Për udhëheqjen e Shtetit Islamik kanë qenë disa muaj të këqij.
Forcat e koalicionit kanë kapur Abu Daëudin, lider i programit të armëve kimike; kemi larguar Abu Sarahin, financier i Shtetit Islamik në Irak; Haji Imanin, shef i financave i IS-it; Ezat al-Jabourin, figurë e IS-it në Irak, e mos të përmend një numër të luftëtarëve të huaj.
Ata janë jashtë terrenit. Dhe, në javët dhe ditët në vazhdim, synojmë të largojmë figura të tjera”, ka thënë Obama, duke shtuar se Uashingtoni do të vazhdojë të ndihmojë Irakun dhe të shtyjë përpara bisedimet për paqe në Siri.
