Ministrja e Arsimit dhe Sportit Evis Kushi ka reaguar e shqetësuar pasi një vajzë e vogël, ofendoi kryeministrin Rama në protestën për rritjen e çmimeve duke e quajtur “legen”. Ministrja nuk ka nguruar t’i dalë në mbrojtje Ramës duke thënë se fëmija po keqpërdorej nga të rriturit.
“Rastësisht pashë në media një vajzë të vogël rreth 10 vjeçe, hipur në podiumin e protestës, që fliste për rritjen e çmimeve dhe nevojën për rritjen e pagave. Madje mbante në duar dhe fliste edhe për planin urban të një zone këtu në Tiranë. Në një moment të caktuar vajza e vogël, e stimuluar edhe nga duartrokitjet e qytetarëve të ekzaltuar, filloi të shajë me fjalë fyese, madje të turpshme, dhe çuditërisht dhjetëra mikrofona mediash vazhdonin të drejtoheshin me shumë fokus dhe interes ndaj saj. Dukej qartë që gjithçka ia kishin mësuar përmendësh dhe vajza e vogël i artikulonte fjalët pa kuptuar rëndësinë e tyre dhe as arsyet apo qëllimin e vërtetë të protestës”, shkruan Kushi.
Ndër të tjera, ministrja shton se është kundër protestave që keqpërdorin fëmijët dhe se të rriturit duhet t’i lënë ata të rriten të qetë, por harron që rritja e çmimeve nga qeveria e saj po ia bën jetën të vështirë të gjithëve.
“Prandaj unë protestoj kundër atyre prindërve që keqpërdorin, apo lejojnë që fëmijët e tyre të keqpërdoren nga të tjerët në protesta, dhe u bëj thirrje të gjithëve si shoqëri që t’i dënojmë fort dhe të reagojmë ndaj ngjarjeve të tilla. Prindër të dashur, lërini fëmijët të rriten të qetë në fëmijërinë e tyre e të mësojnë sa më shumë vlera! Ju ftoj të jeni mbështetës edhe për mësuesit e fëmijëve tuaj, duke i përgatitur ata si qytetarë të mirë e të denjë për shoqërinë tonë”, shtoi ajo.
Kujtojmë se ngjarja në fjalë ndodhi në protestën masive të së shtunës, ku një vajzë e vogël bëri thirrje në protestë për uljen e çmimeve nga ku shtoi se ndonëse kishte ditëlindjen, kishte shkuar të protestonte.
