Kapiteni legjendar i Romës, Francesco Totti ka folur në prezantimin e finales së Kupës së Italisë, ndërsa dha edhe disa deklarata për skuadrën e Mourinhos dhe të ardhmen e saj.
Gjithashtu, Totti u shpreh se do të jetë i pranishëm në finalen e Conference League që do të zhvillohet më 25 Maj në Tiranë, ndërsa shton se thelbësore është fitorja e trofeut.
Finalja e Ligës së Konferencës? – Ne nuk kemi arritur në një finale europiane prej një kohe të gjatë. Është thelbësore të ngremë një trofe, do të shkojmë në Tiranë të etur dhe luftëtarë deri në fund. Do të shkoj edhe unë në Tiranë.
Gabimet e arbitrave? – Ajo që pamë dje është një nga episodet e shumta kundër Romës. Ne nuk jemi këtu për t’u ankuar çdo herë, por nëse VAR-i nuk i ndihmon gjyqtarët, bëhet gjithnjë e më e ndërlikuar. Nëse dje arbitri nuk mund të shihte as nga monitori, bëhet më e vështirë për të gjithë.
Si mund të përmirësohet Roma? – Me blerjet e duhura, të synuara. Roma stërvitet nga trajneri më i fortë në botë, që di kë të blejë. Klubi do të bëjë gjithçka për ta kënaqur atë.
A mund të përmirësohet Roma edhe me një trajner të ri? – Roma është gjithmonë duke u përmirësuar, vit pas viti. Me ose pa ndryshim trajneri.
