Disa minuta para se të hapnin zjarr në drejtim të lokalit në pronësi të Fatjon Muratit, 3 autorët e atentatit mafioz në Don Bosko lëvizën dy herë me makinë përreth bar-kafed. Më pas ata zbritën nga makina dhe lëshuan breshërinë e plumbave që i mori jetën 58-vjeçares Mimoza Paja.
Kjo e dhënë është përftuar nga kamerat e sigurisë në zonën e Don Boskos, të cilat po analizohen nga hetuesit me qëllim identifikimin e autorëve.
Burime bëjnë me dije gjithashtu se mes pamjeve të shumta të administruara grupi hetimor ka shquar një tjetër automjet që lëviz në zonë përpara krimit.
Kjo makinë po analizohet nga hetuesit, pasi nuk përjashtohet mundësia që të ketë vëzhguar lëvizjet në lokalin e Muratit e më pas të ketë dhënë informacionin për vrasësit.
Kamerat e sigurisë janë e vetmja shpresë që hetusit kanë në lidhje me vrasjen, pasi provat e lëna në vendngjarje nuk kanë ndihmuar aspak hetuesit në identifikimin e autorëve.
Deri në këtë fazë, policia dhe prokuroria ka dyshime se ngjarja të jetë regjistruar si rrjedhojë e përplasjeve mes grupeve kriminale, mes të cilave bën pjesë dhe Fatjon Murati.
Megjithatë ende nuk është e qartë nëse breshëria plumbave që i mori jetën banakieres 58-vjeçare, ishte mesazh apo atentati i mirëfilltë për 32-vjeçarin Murati dhe familjarët e tij që gjendeshin në lokal.
/Tv Klan/
