Senatorët Bernie Sanders dhe Ted Cruz, dy kandidatë që duket se nuk kanë shumë shanse për triumfin përfundimtar në zgjedhjet partiake për nominim presidencial në Shtetet e Bashkuara, kanë shënuar fitore të rëndësishme në shtetin Viskonsin.
CNN raporton se në zgjedhjet partiake në Partinë Demokratike në Viskonsin, Sanders ka fituar 56.4% të votave, ndërsa kandidatja që konsiderohet favorite për të fituar nominimin, Hillary Clinton, fitoi 43.3%.
Megjithatë, për nga numri i delegatëve, Clinton vazhdon të kryesojë me 1,778, ndërsa Sanders ka 1,097 delegatë.
Në Partinë Republikane në Viskonsin ka fituar senatori Ted Cruz me 48.3% të votave, ndërsa favoriti Donald Trump, fitoi 35.1% të votave.
Megjithatë, tani për tani, Trump ka më shumë delegatë, 743, ndërsa Cruz është i dyti me 510 delegatë.
