Kryetarja e Komitetit Teknik të Ekspertëve Mira Rakacolli bëri sot me dije se do të vijojnë të mbeten në fuqi masat kufizuese ndaj koronavirusit edhe për dy javët e ardhshme.
Pra do të vijojë kufizimi i lëvizjeve nga ora 08:00 e mbrëmjes deri në orën 06:00 të mëngjesit, dhe nuk do të lejohen organizimet dhe tubimet me më shumë se 10 persona.
Komunikimi i masave vjen një ditë para nisjes zyrtare të fushatës zgjedhore në vend, ku pritet të ketë organizime nga partitë politike.
“Ka një tendencë uljeje që është e qëndrueshme. Komiteti mendon se këto shifra janë si rezultat i efaksitetit të masave, ka një përmirësim të lehtë të zbatimit të masave, por na vjen keq ta themi, nuk është në nivelet e dëshiruara. Europa po përballet me rritje të numrit të rasteve, disa vende po përballet me valën e tretë. Në Francë, Gjermani. Pavarësisht uljes së indikatorëve, ato mbeten në nivelin që të sugjerojnë që situata mbetet delikate.
Komiteti ka vendosur që masat të mbeten në të njëjtin nivel edhe për dy javë të tjera. Do vazhdojë ora policore nga 20:00 deri në 06:00 të mëngjesit, ku do lëvizet vetëm për emergjenca shëndetësore, ose për emergjenca pune. Baret dhe restorantet do vazhdojnë të punojnë deri në orën 08:00, dhe pastaj do punojnë me delivery, shkollat do të vazhdojnë të mbeten online, fluturimet për në Britaninë e Madhe do të vazhdojnë të mbeten të pezulluara, dhe vazhdon të mbetet në fuqi edhe për dy javë ndalimi i grumbullimeve deri në 10 vetë”, tha Rakacolli.
