Gjatë një takimi me Kryetarin e Kuvendit të Kosovës, Kadri Veseli, Presidenti Bujar Nishani tha se shteti i Kosovës ka edhe detyrimet e tij në aspektet ndërkombëtare duke filluar me definimin e kufijve me fqinjët dhe përkrahjen e fqinjëve në proceset e integrimit euro-atlantik të tyre.
Presidenti Nishani përshëndeti vizitën e zotit Veseli dhe theksoi se marrëdhëniet vëllazërore dhe shumë të veçanta mes dy shteteve duhet të forcohen e zgjerohen në të gjitha fushat e bashkëpunimit, pasi ato janë thelbësore për të ardhmen e kombit shqiptar.
Nishani e siguroi zotin Veseli për mbështetjen e pakursyer të institucioneve shqiptare për të mundësuar në një kohë sa më të shpejtë të anëtarësimit të Kosovës në organizatat më të rëndësishme ndërkombëtare dhe të avancimit të agjendës evropiane, krahas vendeve të tjera të rajonit.
Kryetari i Kuvendit te Republikës së Kosovës Veseli e falënderoi Presidentin Nishani për pritjen e ngrohtë dhe vëllazërore, si dhe për përkrahjen e dhënë për Kosovën dhe të gjithë shqiptarët në rajon.
