Me të Dielën e Larit, e cila u shënua sot, besimtarët katolikë nisin Javën e Madhe të Pashkëve, duke hyrë në një periudhë intensive adhurimi, e cila kulmon me mesnatën e Ringjalljes, çasti më i rëndësishëm i krishterimit.
Qindra besimtarë përjetuan këtë moment gjatë kësaj të diele në qytetin e Shkodrës. Proçesioni u zhvillua nga Kisha e Motrave Stigmatine deri tek katedralja, ku më pas u kremtua mesha e shenjtë.
Ipeshkvi i Shkodrës, imzot, Giovanni Peragine, në fjalën e mbajtur me këtë rast, ftoi besimtarët që të mos e humbin shpresën edhe në momente të vështira.
“Mos kini frikë të përballojmë edhe momentet e vështira sepse jemi të bindur si të krishterë se jemi me Zotin dhe Zoti është me ne, pikërisht në këto momente të vështira”, tha mes të tjerash Giovanni Peragine, Ipeshkvi i Shkodrës.
Dhjetëra besimtarë iu bashkuan ritualit fetar të bekimit të gjetheve të larit edhe në Katedralen e Shën Nikollit në Lezhë.
Rituali u drejtua nga ipeshkvi i Dioqezës së Lezhës, Imzot Otavio Vitale.
“Edhe pse po përjetojmë një situatë shumë të vështirë, ky vit është një vit i përshtatshëm për të dhuruar paqe, për tu lutur për paqen. Për paqe në zemrat tona, për paqe në çdo familje, për paqe në të gjithë boten”, tha mes të tjerash Imzot Otavio Vitale, Ipeshkëv i Lezhës.
Bekimi i Larit është simbol i mbarësisë dhe mirësisë në familjet e besimtarëve, të cilët gjatë Javës së Madhe të Pashkëve adresojnë lutjet e tyre për më shumë mirësi dhe begati.
E Diela e Larit u mbajt edhe në dioqezën e Sapës, atë të Rrëshenit dhe në zona të tjera të vendit.
Kujtojmë se e Diela e Larit për besimtarët katolikë përkujton ditën kur Jezu Krishti hyri në Jeruzalem. Degët e larit janë simbol i paqes dhe mbarësisë që përcillet në banesat e besimtarëve, të cilët marrin pjesë në ritualin që organizon Kisha një javë para Pashkës.
gijotina.com/
