Një ditë pasi ministri grek i Mbrojtjes, Panos Kammenos, paralajmëroi zyrtarisht Shqipërinë “të mos guxojë të sfidojë Greqinë”, në qarqet ekstremiste greke, janë hedhur në veprim.
Bëhet me dije se një flamur grek është ngritur mëngjesin e sotëm në hyrje të kalasë së Himarës, pikërisht në pjesën më të dukshme të saj për vizitorët e turistët.
Nga ana tjetër në aksin rrugor kombëtar Tepelenë-Gjirokastër po mëngjesin e sotëm, rezulton të jenë shkruar me sprajt parrulla për “Vorio-Epirin”.
E përditshmja “Stohos” është hapur me një kryeartikull ku i bën thirrje autoriteteve greke të dëbojnë të gjithë emigrantët shqiptarët, që sipas shkrimit janë “kolona e pestë e Turqisë në Greqi”.
Të gjitha këto reagime ekstremiste kanë nisur pa u mbushur as 24 orë nga deklaratat provokuese të ministrit grek të Mbrojtjes, Panos Kammenos.
