Drejtori i Policisë Rrugore në Policinë e Shtetit Drejtues i Parë, Altin Qato, ka dhënë një deklaratë për mediat në lidhje me situatën e motit në Shqipëri.
Ai ka theksuar se gjatë ditës së djeshme dhe natës, reshjet e borës si dhe temperaturat shumë të ulëta kanë shkaktuar ngrica e akull, kryesisht në akset rrugore rurale malore, ku Policia e Shtetit ka marrë një sërë masash për t’ju ardhur në ndihmë gjithë përdoruesve të rrugës në rast nevoje.
Shërbimet e Policisë Rrugore janë të gjitha në terren duke monitoruar qarkullimin dhe për t’ju ardhur në ndihmë banorëve në rast nevoje. Në zonat me rrisk, do ketë patrullime të shtuara nga Policia për të orientuar drejtuesit e mjeteve.
Me qëllim parandalimin e aksidenteve rrugore, Policia apelon për të gjithë drejtuesit e mjeteve, që në rradhë të parë të shmangin lëvizjet e panevojshme kryesisht në zona malore ku ka prezencë të dëborës, ngricës e akullit.
