Aktivistë dhe qytetarë kanë ndezur qirinj te Kryeministria në shenjë homazhi për 7-vjeçaren që humbi jetën në Himarë, pasi u godit nga skafi i drejtuar nga polici Arjan Tase. Ndërsa janë mbledhur në shkallët e godinës në nder të vogëlushes, ata kanë dhe një kërkesë për qeverinë. Aktivistët kanë kërkuar dorëheqjen e Ministrit të Brendshëm, Bledi Çuçi, Drejtorit të Përgjithshëm të Policisë së Shtetit zoti Gledis Nano dhe Ministres se Turizmit dhe Mjedisit Mirela Kumbaro. Po ashtu, ata kanë shprehur ngushëllimet për familjen e 7-vjeçares, për të kaluar dhimbjen e thellë që ka tronditur çdo shqiptar. Më herët ata iu kishin kërkuar qytetarëve që të mblidheshin në protestë për të kërkuar largimin e ministrave, duke thënë se papërgjegjshmëria e tyre solli këtë tragjedi të rëndë.
“Në orën 20:00 qytetarët ndezën qirinj tek Kryeministria si Homazh për 7 -vjeçaren që humbi jetën si pasojë e krimit shtetëror në Plazhet e Vdekjes. Tek Kryeministria pas ngjarjes makabre te kryer nga një punonjës me detyra te larta në Policinë e Shtetit, i cili vrau me skaf një vajzë 7 vjeçe ne breg të detit.
Hajeni të kërkojmë dhe tregojmë se kush është përgjegjësi dhe të kërkojmë ne dritën e qirinjve, me një buqete lulesh, me një mesazh ne një cope letër, pak dinjitet për veten, se e pafajshmja u largua…. Të kërkojmë shkarkimin ose… Dorëheqje e Ministrit te Brendshëm zotit Bledi Çuçi Dorëheqje e Drejtorit të Përgjithshëm të Policisë së Shtetit zoti Gledis Nano Dorëheqje e Ministres se Turizmit dhe Mjedisit Mirela Kumbaro”, thuhet në reagimin e aktivistëve.
