Gjykata e Lezhës ka dënuar me 7-vite burg ish-efektivin e policisë Kol Kola, i cili u arrestua në muaj maj të vitit 2021 për ngacmim seksual të një vajze të mitur 13-vjeçare.
63-vjeçari u gjet fajtor për veprën penale “Ngacmim seksual” dhe gjyqtari Ilir Përdeda dha dënimin maksimal për të pandehurin, ndërsa për veprën penale “Kryerja e veprimeve ose dhënia e urdhrave arbitrare” mori pafajësi, pasi gjykata doli në konkluzionin se nuk ka element të veprës penale.
Asokohe, e mitura deklaroi se polici e kishte marrë në makinë dhe dërguar në një apartament në qytetin e Lezhës dhe kishte tentuar të kryeje marrëdhënie seksuale. Pas verifikimeve përmes provave shkencore dhe pamjeve filmike u provua se ka elementë të veprës penale dhe prokuroria kërkoi menjëherë ndalimin e policit.
Në përfundim të hetimeve, prokurori Françesk Ganaj doli në konkluzionin se Kol Kola me detyrë Ndihmës Specialist i Policimit në Komunitet pranë Komisariatit të Policisë Lezhë, “duke keqpërdorur atributet që i jep detyra funksionale, nëpërmjet mashtrimit se do ta shoqëronte në Komisariatin e Policisë, e ka marrë të miturën në makinë dhe e ka dërguar në një banesë në qytetin e Lezhës, që e kishte në përdorim, duke kryer veprime të turpshme me të”. Ndërkohë vetë i pandehuri i ka mohuar në vazhdimësi akuzat, duke e konsideruar ngjarjen inskenim.
