Vdekja e parakohshme e supermenaxherit Mino Raiola ka tronditur botën e sportit dhe futbollin në veçanti. I dashur nga kushdo që ishte në gjendje t’ia shijonte ndihmën, por edhe tip i vështirë për president të ndryshëm, Raiola ka ndikuar përgjithmonë metodat e merkatos.
Lajmet e fundit rreth tij kanë qenë të lidhura vetëm me problemet e shëndetit që i shkaktuan vdekjen, e cila ndodhi në spitalin “San Raffaele” në Milano, të shtunën më 30 prill.
Gjendja e tij, e rënduar në ditët e fundit, në fakt ka qenë shqetësuese që nga fillimi i vitit. Nga janari i kaluar qarkulluan thashetheme mbi Raiolën për probleme të ndryshme që e kishin detyruar të shkonte më shumë se një herë në spital. Nga ana e tij, menaxheri e kishte mohuar gjithmonë, ashtu siç bëri edhe më herët, të premten kur doli lajmi për vdekjen e tij.
Por fatkeqësisht lajmet për kushtet e tij të pasigurta shëndetësore kanë dalë, përtej mohimeve dhe vullnetit të hekurt për të ruajtur një nivel shumë të lartë privatësie. Diçka ishte zbuluar në fillim të vitit kur u përhap lajmi, i konfirmuar më vonë, për shtrimin e tij në spital më 12 janar.
Asnjë njoftim zyrtar, disa thashetheme për një problem në mushkëri, siç kishte arritur të zbulonte e përditshmja gjermane ’Bild’, që pati caktuar edhe një operacion urgjent dhe terapi intensive. Kishte nga ata që e kishin lidhur situatën e Raiolës me Covid-19, por në fund gjithçka rezultoi një flluskë përmes mohimit të thatë të bërë nga njerëz të afërt rreth 56-vjeçarit.
