Drejtori i Zyrës për Kosovë dhe Metohi, Petar Petkoviç është shprehur se Prishtina nuk duhet të tentojë të rrezikojë sigurinë e serbëve në këto zona.
Petkoviç ka reaguar pas komenteve se Prishtina mund të tentojë të marrë nënstacionin e Valaçit dhe hidrocentralin e Gazivodës, si pasojë se situatës së komplikuar energjetike.
Në një komunikim për mediat ai ka thënë se Serbia po bën gjithçka për të mbrojtur popullin serb, po ashtu ka kritikuar edhe qëndrimin e kryeministrit të Kosovës Albin Kurti, duke thënë se ky i fundit është njeri i rrezikshëm.
“Kurti është njeri i rrezikshëm dhe ne duhet të kthehemi në tryezën e bisedimeve”, ka thënë ai.
Kujtojmë që edhe presidenti serb Aleksandër Vuçiç ka thënë se autoritetet e Kosovës së shpejti do të provojnë të marrin në kontroll nënstacionin elektrik të Valaçit në veri të Kosovës, ndërsa ka kërkuar që Prishtina të mos e bëjë këtë.
Qytetarët e komunave në veriun e Kosovës – Mitrovia e Veriut, Leposaviqi, Zubin Potoku dhe Zveçani – që nga viti 1999 nuk paguajnë rrymën dhe ujin. Vlerësohet se borxhi për rrymën e shpenzuar në këto komuna është 8 milionë euro në vit.
Nga viti 1999 deri në vitin 2017, këtë borxh e kanë paguar qytetarët e Kosovës, nga komunat tjera, duke pasur faturat e tyre më të shtrenjta për 3.5 për qind.
Pas ankesave, Gjykata e Apelit ka vendosur të pezullojë këtë praktikë, sepse ka qenë e paligjshme. Zyrtarë të sektorit të energjisë e kishin të pamundur qasjen në veri të Kosovës dhe nuk arritën të lexojnë njehsorët, t’ua dërgojnë faturat qytetarëve në veri dhe as të mbledhin të hyrat për energjinë e shpenzuar atje.
