Kuvendi i Maqedonisë së Veriut ka miratur me 68 vota pro propozimin francez për marrëveshjen me Bullgarinë, që i hap rrugën hapjes së negociatave të Shqipërisë me BE-në. Deputetët e opozitës nuk morën pjesë në votim dhe propozimi u kalua vetëm me votat e shumicës.
Ndërkohë jashtë Kuvendit janë duke u mbledhur dhjetëra qytetarë për të protestuar kundër këtij vendimi për javën e dytë rradhazi. Protestat u thirrën nga opozita vendase të kryesuar nga VMRO-DPMNE-ja dhe e Majta.
Seancat e Kuvendit janë shoqëruar me debate të ashpra që ditën e djeshme agravuan edhe në përplasje mes deputetëve të opozitës dhe mazhorancës. Nuk kanë munguar akuzat për deputetët shqiptar ku sipas opozitarëve ata nuk kanë të drejtë të zgjedhin fatin e maqedonasve dhe se shqetësimi i tyre më i madh është integrimi i Shqipërisë.
Me miratimin e sotëm i hapet rruga e nisjes së procesit të integrimit për Maqedoninë e Veriut dhe Shqipërinë drejt Bashkimit Europian. Presidentja e Komisionit Europian Ursula von der Leyen mbajti një fjalim në seancën e parë të Kuvendit ku u zotua se nëse miratohet propozimi francez javën e ardhshme do të mbahet konferenca e parë ndërqeveriatare.
Më 30 qershor, qeveria e Maqedonisë së Veriut pranoi një propozim të modifikuar nga presidenca franceze, pas së cilës filloi një proces konsultimi, fillimisht me qeverinë dhe partnerët e koalicionit, e më pas me presidentin, parlamentin, opozitën, si dhe me sektorin civil. Kryeministri i Maqedonisë së Veriut, Dimitar Kovaçevski, deklaroi se propozimi i modifikuar përfshin vërejtjet dhe qëndrimet e konstruktuara qartë të palës maqedonase, parasheh një pranim të qartë dhe pa mëdyshje të gjuhës maqedonase, si dhe atë që protokolli me Bullgarinë të mos jetë pjesë e kornizës negociuese. Propozimi francez është një dokument që duhet të çojë në heqjen e vetos 2-vjeçare të Bullgarisë për integrimin e Maqedonisë së Veriut në BE.
