Ish kryeministri Sali Berisha ka marrë fjalën në protestën e sotme pas incidentit që i ndodhi, ku një person i identifikuar si Gerti Shehu e qëlloi me grusht në fytyrë duke e gjakosur.
Në bulevardin Dëshmorët e Kombit, Berisha u dha një mesazh liderëve të BE që janë sot të pranishëm në Tiranë për samitin me vendet e Ballkanit Perëndimor. Berisha tha se në tryezë ata janë ulur me kryeministrin shqiptar “që në gjithë kodet e botës duhet të ishte para drejtësisë”.
“Në emër tuaj më lejoni t’u uroj me gjithë zemër mirëseardhjen në Tiranë shtetarëve më të lartë të vendeve anëtare të BE. Për ne është një rast shumë i veçantë tu shprehim atyre PE dhe KE mirënjohjen më të pakufishme për ndihmën e gjithanshme, solidaritetin që u keni dhënë e u jepni shqiptarëve. Ky samit është mbështetje e madhe për gjithë shqiptarët që integrimin në BE e konsiderojnë si të ardhmen më të mirë për vete e vendin.
Sot të ardhurat janë rritur minimalisht 25 herë, bujaria e kombeve e vendeve tuaja ka qenë e një rëndësie thelbësore në këtë arritje ndaj u mbetemi borxhlinj përjetë për ndihmën e çmuar. Zoti bekoftë kombet e vendet tuaja. Ne përfaqësohemi në këtë samit me njeriun që në gjithë kodet e botës duhet të ishte para drejtësisë e jo aty i ulur me ju. Ne sot ndihemi fatkeq se pushteti i atij që na përfaqëson qëndron mbi krimin elektoral, votën e vjedhur të qytetarëve, mbi drogën korrupsionin e të zezat e tjera ndaj këtij kombi. Sot Evropa e bota kanë mundësi të njihen me të vërtetat e Shqipërisë, ne miqve do u themi të vërtetën, ne nuk jemi këtu në manifestim festiv si do donim të ishim. Sot të jehojë dhe zëri i popullit opozitar”, tha Berisha.
