Në kulmin e krizës së rritjes së çmimeve, qeveria Rama njoftoi sot nisjen e Javëve Kulturore Ndërkombëtare, e cila do të financohet nga fondet e qeverisë. Kryeministri tha se fondi për aktivitetin do të jetë 100 milionë lekë të reja duke e konsideruar si shifër modeste, por harron që shumë prej qytetareve të këtij vendin jetojnë në varfëri.
Rama nuk e priti mirë pyetjen e cila kishte të bënte me promovimin e projektit për kulturat e huaja në vend, duke e quajtur si groteske.
“Këtu nuk është fjala për të promovuar armik, por për të ushqyer veten, fëmijët tanë me menunë fantastike të të gjitha kulturave, për ta bërë këtë financimi i vënë në dispozicion është modest, me atë që duhet të ishte dhe me atë që sjell mbrapsht, si vlerë e shtuar në organizmin e shoqërisë sonë. Është pyetje groteske, se kuptoj si mund të trajtohet kultura e të tjerëve si e të tjerëve, ajo është dhe e jona, jemi banorë e njëjtë, i përkasim kësaj bashkësie. Kështu që ky është minimumi i asaj që mund të bëjmë. Janë vendet e tjera që organizojnë së bashku me ne, një pjesë të madhe të kësaj veprimtarie, duke pasur parasysh kosto të të gjitha natyrave. Kjo është një tjetër arsye se përse duhet të jemi një kulturë e përbashkët”, tha Rama.
