Kryetari i grupit parlamentar të PD, Enkelejd Alibeaj ka qenë gjithashtu i ftuar në konferencën e organizuar për 100-vjetorin e marrëdhënieve mes Shqipërisë dhe SHBA, ku të pranishëm ishin diplomatja Yuri Kim dhe Sekretari i Shtetit, Mike Pomepo.
Në fjalën e tij, Alibeaj nuk u kursye në sulmet ndaj ish kryeministrit Sali Berisha duke e cilësuar si një “mbetje e mentalitetit të diktaturës komuniste” dhe për të cilin tha se ka vënë interesin personal para së gjithash duke u bërë kërcënim ndaj partneritetit me ShBA.
“Mbetjet e mentalitetit të diktaturës komuniste, pushtetarët e korruptuar, ata që kanë vënë interesin e tyre mbi atë të shqiptarëve kanë qenë dhe mbeten kërcënimi më i madh ndaj partneritetit tonë me ShBA. Edhe sot ka ende të tillë. Ka njerëz që kanë humbur busullën e që duan t’i tregojnë rrugën Amerikës. Kanë humbur rrugën në oborr dhe duan t’ia humbin rrugën edhe Shqipërisë. Nuk do t’ia dalin. Nuk do t’ia dalin sepse kanë kundër shumicën dërrmuese të shqiptarëve dhe historinë e tyre mbi 100-vjeçare. Partia Demokratike është sot më e kthjellët se kurrë, se ajo Amerikë që vulosi suksesin e lëvizjes demokratizuese të vendit në fillim të viteve 1990, vetëm besimi te vlerat e demokracisë që ajo përfaqëson, do të mund ta nxjerrin Shqipërinë nga kurthi i politikës së korruptuar dhe të dështuar të tranzicionit”, theksoi Alibeaj.
