Deputetja e Partisë Demokratike, Jozefina Topalli, replikoi nga foltorja e Kuvendit sot me deputetin Taulant Balla, kreun e grupit të PS, pasi ky i fundit i përmendi emrin për humbjen e thellë në diasporë, rikthimin në PD dhe dështimet politike pranë Sali Berishës.
Topalli i kujtoi kolegut të mazhorancës se ajo u largua nga PD për shkak të Lulzim Bashës, të cilin Balla e takonte fshehurazi dhe madje socialistët e kontrollonin kreun e selisë blu në atë kohë.
“E para duhet të them se për një seancë normale plenare e vetmja mënyrë është zbatimi i rregullores. Tashi po i kthej përgjigje parafolësit. Dihet publikisht që kam kriju një lëvizje. Isha një vit para më 2021, isha nënkryetare e PD dhe vura re se ishte njëri kryetar që ju e kontrollonit në çdo lëvizje, e majmosshit atë dhe familjen e tij (nënkupto, i jepnit benefite). Nuk të kam takuar kurrë në jetën time por ke takuar fshehurazi Lulzim Bashën (i drejtohet Ballës), ndaj atë që the merre me vete”, tha Topalli mes të tjerash.
Më tej ajo tha se ishte e vështirë ajo periudhë për të, por koha i dha të drejtë, ashtu siç dhe u provua se zgjedhjet e 11 majit u manipuluan nga pushteti, e faktuar edhe në raportin e ODIHR. Ajo akuzoi Ballën se i bëri presion Diasporës për zarfat e votave, duke i kërcënuar me pasoja.
“Sigurisht ka qenë e vështirë për mua por koha më ka dhënë të drejtën që nuk heshta dhe jam krenare për këtë. Për zgjedhjet në Shqipëri raporti i ODIHR e thotë qartë se si është vjedhur e blerë vota, se si janë dhënë paratë. Ka një frazë që ju nuk e përmendni ju asnjëherë aty. Vija ndarëse mes pushtetit dhe partisë nuk ekziston më. Mendoni se çfarë keni bërë ju këtu dhe në Diasporë, me zarfat duke ua dërguar, zotrote shkove vetë atje me administratën, duke i kërcënuar, se do i hiqje bukën e gojës nëse Diaspora nuk do ia jepte juve votën. Në Bjellorusi votat vidhen me 70%, kurse në Shqipëri me 90%”, përfundoi Topalli, teksa fjala iu ndërpre edhe për shkak të minutazhit të kufizuar.
