Qeveria ka vendosur të bëjë një ndryshim në skemën e pensioneve. Sipas planit afat mesëm në 2023 do të ndalohet kategorisht shpërndarja e pensioneve dorë më dorë. Deri më tani ata që tërheqin pensionin nga Posta Shqiptare, i marrin paratë në dorë, por tashmë ky veprim do të kryhet vetëm nëpërmjet transaksioneve bankare. Kjo do të thotë se synohet që si pensionet ashtu dhe ndihma ekonomike të kalojnë direkt në një llogari bankare në bankë.
Plani është që deri në vitin 2023, rreth 70 për qind e qytetarëve të përdorin llogaritë bankare. Objektivi kryesor i Strategjisë Kombëtare për Pagesat me Vlerë të Vogël është që të promovojë përdorimin e shpeshtë të instrumenteve të pagesave modernë në të gjithë vendin, me qëllimin për të arritur 10 pagesa jo cash për person deri në fund të vitit 2023 dhe për këtë synohen që të hartohet dhe zbatohet legjislacioni përkatës.
Sipas draftit, një projektligj “mbi llogarinë e pagesave” është përfunduar nga Banka e Shqipërisë në vitin 2021, që synon arritjen e një shkalle të volumeve të pagesave duke përcaktuar kriteret për përdorimin e një “llogarie bazë” e cila nuk ka kosto, ose një kosto të ulët për këtë kategori. Po ashtu, rekomandohet që programet e asistencës sociale që nënkuptojnë shpërndarjen periodike monetare për përfituesit të kryhen nëpërmjet llogarive të përfituesve në banka apo nëpërmjet produkteve të tjera të sistemeve të pagesave dhe jo cash sikurse shpërndahet aktualisht.
