Ende pa kaluar 24 orë nga vendosja e një çmimi rekord të naftës në vend, që arriti në 265 lekë për litër, Bordi i Transparencës është mbledhur sërish për të ndryshuar çmimin e hidrokarbureve në treg.
Këtë të shtunë, Bordi ka vendosur që nafta do të shitet me 261 lekë për litër, benzina do të shitet me 236 lekë për litër, ndërsa gazi me 86 lekë.
Në njoftimin e datës 18 qershor, Bordi është kujdesur të dalë dhe me një sqarim ku thotë se ky është çmimi maksimal i shitjes dhe se nën këtë çmim mund të shitet, ndonëse asnjë nga pikat e karburanteve nuk tregohet aq “bujare” që të shesë nën çmimin e përcaktuar nga Bordi.
Njoftimi i plotë:
Bordi i Transparencës në datë 18 Qershor 2022, në mbledhjen e radhës vendosi:
Çmimi i shitjes me pakicë i nënproduktit gasoil i standardit SSH EN 590 të jetë 261 lekë/litri, ndërsa i shitjes me shumicë 249 lekë/litër.
Çmimi i shitjes me pakicë i nënproduktit benzinë e standardit SSH EN të jetë 236 lekë/litri, ndërsa i shitjes me shumicë 224 lekë/litër.
Çmimi i shitjes me pakicë i nënproduktit gaz, të jetë 86 lekë/litri me pakicë dhe i shitjes me shumicë 74 lekë/litër për automjetet.
( Shënim: çmimi i shitjes për gazin e lëngshëm të automjeteve do të jetë çmimi i furnizimit në stacionet e furnizimit në pikat e karburanteve, ndërkohë që në pikat e tjera për konsumatorët familjarë dhe industrial çmimi nuk duhet të përfshijë akcizën).
?Çmimet e caktuara nga Bordi do të hynë në fuqi sot datë 18 Qershor ora 18.00 p.m dhe do të jenë të vlefshme deri në mbledhjen e ardhshme të bordit ku do të pasqyrohen ndryshimet e çmimeve të shitjes.
Tërheqim vëmendjen e çdo operatori të shitjes me shumicë dhe pakicë të nënprodukteve të naftës mbi detyrimin e zbatimit të këtej vendimi.
Në rast të shkeljeve të konstatuara nga operatorë të ndryshëm do të vendoset pezullimi i aktivitetit.
Jemi në monitorim të vazhdueshëm të ecurisë së bursave, me qëllim reagimin sa më të shpejtë.
