Tabela që tregon pikën turistike ka përfunduar në kovën e eskavatorit. Rruga e ndërtuar nuk është e përfshirë në lejen mjedisore për ndërtimin e HEC-it
Këto pamje të shkatërrimit të Valbonës janë me të vërtetë tronditëse. Tabela që të drejtonte për tek “Guri i Stakës”, pikë turistike, ka përfunduar në kovën e eskavatorit. Është pamja e trishtuar e rrugës së re, e ndërtuar këto ditë nga kompania që po ndërton HEC-in Dragobia në Luginën e Valbonës. Siç e shihni janë prerë pemë dhe është dëmtuar ndjeshëm një sipërfaqe e madhe në Valbonë.
Këto pamje dhe kjo rrugë janë një mundësi e mirë që qeveria Rama ta ndalë vazhdimin e ndërtimit të HEC-ve në Valbonë, sepse kjo rrugë nuk është e përfshirë në lejen mjedisore të marrë nga kompania për të ndërtuar HEC-n në Luginën e Valbonës. Banorët e Valbonës thonë se kanë kërkuar të njihen me projektin dhe dokumentacionin, por nuk janë lejuar të kenë informacion rreth tij. Megjtihatë, ata kanë zbuluar se rruga që po shihni nuk është e përfshirë në lejen mjedisore të kompanisë.
Në foton e projektit duket qartazi rruga e shënjuar me ngjyrë portokalli, e cila është shtesë në krahasim me projektin tjetër atë është miratuar nga KKT për ndërtimin e HEC-it. Ja dhe mundësia e Ramës për ta ndalur shkatërrimin e Valbonës. Banorët e Valbonës i bëjnë thirrje kryeministrit të ndalë masakrën atje referuar duke paralajmëruar që rruga pa leje nuk i lë më asnjë mundësi justifikimi. Kryeministrit Rama pretendon se koncesionin për HEC-et në Valbonë i ka dhënë qeveria Berisha ndërsa ndërprerja e kontratës penalizon buxhetine shtetit. Ndërkohë që devijimi nga projekti nga ana e kompanisë i jep mundësi qeverisë Rama të mos trembet nga arbitrazhi, por të ndalë me urgjencë ndërtimin e HEC-ve dhe të tregojë konkretisht se vullneti i tij qenka i ndryshëm nga ai i qeverisë Berisha, kundër shkatërrimit të Valbonës.
Më poshtë publikohen foto të realizuara sot në Valbonë atje ku po ndërtohet HEC i parë për t’u pasuar me 13 të tjerë.
