Me nisjen e fazës së parë të mbjelljeve për projektin e Pyllit Orbital, Kryebashkiaku Erion Veliaj tha se ndërtimet pa leje në parkun e Liqenit Artificial, do të prishen.
“Deri në fund të tetorit është afati për prishjen vullnetare të ndërtimeve pa leje në pjesën jugore të Liqenit, që ka qenë pjesë e ish-komunës Farkë. Nën drejtimin e administratorit, aty do të vazhdojmë një proces gjelbërimi”, tha Veliaj.
Kryebashkiaku i Tiranës mori sot pjesë në mbjelljen e 150 pemëve pranë Liqenit të Thatë, në pjesën jugore të parkut.
Në periudhën vjeshtë-dimër, kryetari i bashkisë ka planifikuar të mbillen aq pemë sa të krijohet gjurma e Pyllit Orbital: “Dua që t’i ftoj të gjithë ata që kanë mundësi të kontribuojnë, të na japin pemë. Sot, një makinë prodhon toksina, prodhon helme, dioksid karboni, të cilat mund të zerohen vetëm me mbjelljen e 2 pemëve. Pra, një biznes që ka 50 makina, mjafton t’i dhurojë qytetit 100 pemë dhe ka zeruar të gjithë impaktin që ka me dioksidin e karbonit në qytet”.
