Kreu i Policisë së Shtetit, Gledis Nano, ishte i thirrur nga Komisioni i Ligjeve për të deklaruar në lidhje me prishjen e banesave te “5 Maji”.
Nano bëri një rezyme të shkurtër të veprimeve të forcave të policisë, ditën e prishjes së banesave. Ai u shpreh se Policia i është përgjigjur kërkesës së Bashkisë së Tiranës për lirimin e sheshit për prishjen e banesave në rrugën 5 “Maji”
“Në datë 19 janar, struktura e Policisë së shtetit, në mbështetje të kërkesave të bashkisë Tiranë, kanë ndihmuar në lirimin e sheshit për prishjen e banesave në rrugën 5 Maji. Në vijim të kërkesës për shmangien e incidenteve gjatë prishjes së banesave në rrugën 5 Maji, si dhe kërkesës së Komisariatit numër 4 për mbështetje. Është tentuar t’i vihet flaka një mjeti parkuar në një nga shtëpitë, që mund të rrezikonte jetën e banorëve, në këto kushte janë shoqëruar 8 shtetas” – u shpreh Nano.
Më tej ai ka thënë se gjatë shoqërimit të personave në fjalë është përdorur forcë proporcionale si dhe protestuesit e kanë kërcënuar kryebashkiakun, Erion Veliaj.
“Theksojmë se gjatë shoqërimit të personave në fjalë është përdorur forcë proporcionale. Personat e shoqëruar janë lënë të lirë menjëherë pas procedurave. Në një intervistë në media, shtetasi në fjalë ka kërcënuar publikisht kryetarin Erion Veliaj. Po ashtu është paraqitur në komisariat, një shtetas i cili thotë se është dëmtuar gjatë ushtrimit të detyrës së tij si gazetar, nga policia. Mbështetja do të vijojë në bazë të kërkesave të bashkisë Tiranë” – tha Nano.
