Çmimi rekord i tregtimi të naftës me 258 lekë për litër, ka sjellë reagime të shumta ndryshme ku vetëm sot Konfindustria i ka dërguar një kërkesë urgjente qeverisë Rama pas rritjes së paprecedentë të hidrokarbureve.
Shqiptarët paguajnë çmimin më të lartë në rajon për karburantet, prandaj Konfindustria kërkon që të “shkrihet” Bordi i Transparencës dhe të krijohet “Entit Rregullator i Karburanteve” si institucion profesional i përhershëm, në varësi të Kuvendit të Shqipërisë.
Gjithashtu Konfindustria kërkon që qeveria fillimisht të ndërhyjë në uljen e ngarkesës fiskale të karburanteve në nivele të njëjta me shtete fqinje të Shqipërisë.
“Konfindustria kërkon ndërhyrjen e menjëhershme të qeverisë për ndryshimin të politikave fiskale me qëllim uljen e çmimit të karburanteve në tregun shqiptar. Çmimet e larta të karburanteve po prodhojnë pasoja shkatërruese për prodhimin vendor, industritë, bizneset dhe qytetarët shqiptarë. Çmimi i karburanteve në tregun shqiptar në javën e parë të qershorit 2022 shkoi në rekordin historik të afër 2,3 euro/litër më i larti në rajon dhe nga më të lartët në Europë. Në Kroaci çmimi i naftës është 1,7 euro/litër. Çmime ndjeshëm më të ulëta ka Maqedonia e Veriut, Kosova, Mali i Zi, etj. Konfindustria kërkon si ndërhyrje të parë uljen e ngarkesës fiskale të karburanteve në nivele të njëjta me shtetet e rajonit. Përveç me pasoja të pallogaritshme të rënda në ekonominë kombëtare taksimi shumë i lartë i karburanteve është burimi më i madh i shmangies fiskale me qindra milion euro në dëm të buxhetit të shtetit. Sipas të dhënave krahasuese në Shqipëri deklarohet pothuaj 20% konsum karburanti më pak nga Kosova kur duhet të ishte krejt e kundërta. Konfindustria vlerëson, se është domosdoshmëri ç’bërja e Bordit të Transparencës dhe krijimi i Entit Rregullator të Karburanteve si institucion profesional i përhershëm, në varësi të Kuvendit të Shqipërisë sipas shembujt të ngjashëm të shteteve fqinje”, shprehet Konfindustria.
