Deputeti i Partisë Demokratike Ervin Salianji ka dhënë një deklaratë për mediat pasi mungoi në mbledhjen e sotme të kryesisë së grupit parlamentar të PD të thirrur nga Enkelejd Alibeaj.
Salianji u shpreh se mbledhja nuk ka pasur kuorum, pasi rregullorja e përcakton qartë se në mbledhjen e kryesisë marrin pjesë dhe kryetarët apo nënkryetarët e komisioneve parlamentare që përfaqësojnë PD-në.
Ndër të tjera, deputeti demokrat tha se drafti i prezantuar nga Alibeaj për kushtet që duhet të kenë kandidatët për President i shërbejnë vetëm Ramës.
“Edhe sot nuk pati mbledhje të kryesisë së grupit, pati një përpjekje nga unë, për të qenë pjesë dhe deputetë nga Komisioni i Rithemelimit. Ne funksionojmë me rregulloren e grupit, kryesia e grupit parlamentar përbëhet dhe nga kryetarët e grupeve parlamentareve, nuk bëhet mbledhje me 3 persona, se nuk ka pasur kuorum. Të thuash që kandidati për president të mos ketë qenë në politikë 5 vitet e fundit, është ti shërbesh Edi Ramës. Presidenti nuk ka pse të jetë një pensionist, nuk mund të vësh kritere qesharake, që kandidati për president të ketë qenë pjesë e kauzave civile, e gjitha kjo shërben për të tërhequr vëmendjen”, tha Salianji.
