Mungesa e mjekëve në spitalet e bashkive të Përmetit, Tepelenës, Memaliajt ka bërë që banorët e këtyre bashkive të jenë të detyruar që për një vizitë rutinë t’i drejtohen Spitalit Rajonal “Omer Nishani” në Gjirokastër. Kjo ka sjellë rritje të kostove për qytetaret të cilët janë të detyruar të marrin shpesh edhe taksi për të ardhur në qytetin e Gjirokastrës.
Qytetarët shprehen të revoltuar pasi jo vetëm kjo, por edhe fakti që duhet të paguajnë për vizitat shkakton kosto te papërballueshme për xhepat e tyre si dhe ju duhet të presin për orë të tëra në radhë për të marrë shërbimin.
“Kam që në shtatë të mëngjesit. I raftë zjarri qeverisë dhe këtyre bashkë se populli shiheni sesi rri. Po të vish këtu, të gjithë i ke këtu gjatë ditës. Unë jam sakat, jam invalid, të pres doktorin tani kur të vijë ai. Pse nuk vijnë që në mëngjes, vijnë hallexhinjtë nga tëra anët e botës dhe nga gjithë fshatrat. Unë po të kisha lekë do hyja të privati, nuk hyja fare këtu”.
Shefja e pavionit të poliklinikës, Jona Leka shprehet se së fundmi kanë ardhur mjekë specialistë me kontratë, dhe ajo vetë është një e tillë, dhe vendimi i marrë së fundmi është për barnat e rimbursueshme ku pacientët mund të aplikojnë online.
Gjithashtu edhe në Spitalin Rajonal “Omer Nishani”, në Gjirokastër shpesh ka mangësi mjekësh specaliste si anestezisti që është i vetëm, shpeshherë qytetarëve iu duhet ti drejtohen sipitalit të Fierit në raste emergjence ose Tiranë. Dhe kur realiteti është i zymtë në qendrën e Qarkut nuk është e vështirë të imagjinohet se çfarë ndodh në spitalet bashkiake.
