Moti i keq, me reshje të dendura shiu dhe erë të fortë, që përfshiu vendin mbrëmjen e së mërkurës, ka shkaktuar një sërë problematikash në qarkun e Shkodrës. Bëhet me dije se mungon energjia elektrike në disa fshatra të bashkisë Vau i Dejes, konkretisht në Njad Vau Dejes, Bushat, Njad Hajmel dhe Vig Mnele.
Në Pukë, era e fortë ka dëmtuar një pjesë të çatisë së spital, e cila ishte prej llamarine. Era ka shkëputur nga çatia mbulojën metalike duke nxjerr jashtë funksioni dy pavione. Konkretisht pavionin e Patologjisë dhe Pediatrisë.
Stuhia ka shkaktuar dëmtime dhe në rrjetin energjitik. Puka ka mbetur pa energji elektrike prej mbrëmjes së kaluar. Po ashtu probleme ka edhe në akset rrugore që përshkojnë zonën. Në disa rrugë nacionale ka rrëshqitje inertesh dhe në akset rurale ka dëmtime të mëdha.
Po ashtu, një sërë problematikash janë regjistruar edhe në bashkinë Fushë Arrëz, ku për shkak të reshjeve të dendura të shiut, pothuajse të gjitha rrugët rurale janë të bllokuara nga rrëshqitja e dherave dhe gurët. Që nga pasdtitja e djeshme (20 nëntor), ka shkëputje të energjisë elektrike në njësitë administrative Qafe-Mali, Iballe, dhe Blerim.
Në qytetin e Fushe Arrëzit, për shkak të erës së fortë është dëmtuar edhe një pallat, ku është shkëputur katramaja.
Në Qafëthore dhe Vermoshi kanë filluar reshjet e dëborës, teksa ARRSH njofton se deri më tani rruga është e hapur dhe qarkullimi kryhet pa probleme.
Agjencia Kombëtare e Mbrojtjes, bazuar në parashikimet meteorologjike, paralajmëron se mot me reshje të dendura pritet gjatë ditëve në vijim, kryesisht në veri të vendit. “Bazuar në informacionin e dërguar nga Qendra e Koordinimit të Emergjencave Civile në Bruksel, Instituti i Gjeoshkencave dhe Shërbimi Meteorologjik Ushtarak, të premten, më 22 nëntor, priten reshje “intensive” deri “shumë intensive” në qarqet Shkodër, Kukës, Dibër, Tiranë dhe Elbasan. Në qarqet e tjera priten reshje mesatare, të cilat lokalisht mund të arrijnë deri në nivelin “intensive””, thotë agjencia në një njoftim.
Agjencia Kombëtare e Mbrojtjes Civile bën me dije se ka kërkuar rritjen e gatishmërisë së strukturave të sistemit të Mbrojtjes Civile, si dhe të institucioneve që administrojnë hidrovoret, rezervuarët, infrastrukturën rrugore, furnizimin me energji elektrike, furnizimin me ujë, monitorimin e nivelit të lumenjve dhe çdo strukturë tjetër në funksion të menaxhimit të emergjencave civile. AKMC u bëri thirrje prefekturave dhe bashkive të mobilizojnë strukturat për menaxhimin e emergjencave civile dhe të monitorojnë situatën në zonat me rrezik më të lartë.
