Për shkak të reshjeve me intensitet të lartë, në qarkun e Gjirokastrës janë shfaqur mjaft probleme. Fillimisht situata ishte e rënduar në përroin e Çullos ku është punuar gjatë gjithë natës nga emergjencat dhe bashkia Gjirokastër si dhe janë vendosur barriera mbrojtëse. Gjithashtu probleme janë shfaqur dhe në Lazarat, për shkak të përroit të Sopotit ku dhe aty është ndërhyrë. Rruga e fshatit Golem është e bllokuar plotësisht.
Problem vazhdon të mbetet edhe mungesa e energjisë elektrike në shumë njësi administrative të bashkisë Gjirokastër, Libohovë, Tepelenë, Memaliaj.
Dhe në Kukës situata është e ndërlikuar për shkak të motit të keq. Në disa rrugë ka rënie inertesh dhe gurësh si dhe bllokime tumbinosh. Ndërsa subjektet kontraktore po punojnë për pastrimin dhe mbajtjen funksionale të tyre. Shumë fshatra në bashkinë Kukës janë bllokuar nga rënia e gurëve dhe dherave duke e bërë të pamundur qarkullimin e banorëve. Fshatrat e bllokuar janë: Nimçë, Carnalevë, Pakisht, Zapot, Xhaferraj, Tërshenë, Çajë, Shkinak etj.
Një kujdes të shtuar kanë marrë edhe rezervuarët, të cilat po mbahen nën monitorim të vazhdueshëm në të gjithë qarkun Kukës.
Aktualisht, reshjet e shiut po bien me intensitet të lartë duke rritur frikshëm edhe prurjet në hidrocentralet e vegjël të Kukësit, prurje të cilat po rrisin me shpejtësi edhe nivelin e ujëmbledhësit më të madh hidrik në vend, atë të Fierzës.
