Shtohen përpjekjet qytetare për të ndalur ndërtimin e HEC-ve në luginën e Valbonës.
Peticioni online është një tjetër rrugë e protestës së qytetarëve kundër ndërtimit të HEC-ve në Valbonë. Ka nisur prej tre ditësh firmosja online e peticionit kundër ndërtimit të HEC-ve në Luginën e Valbonës dhe janë mbledhur deri tani rreth 3 mijë firma. Ndërkohë që më 29 tetor është paralajmëruar një protestë e artistëve e mbështetur nga qytetarët, një iniciativë e këngëtareve shqiptare me famë ndërkombëtarë, Elina Duni e Eda Zari. Thirrjes së dy këngëtareve i janë përgjigjur dhe shumë artistë të tjerë, të cilët pritet të jenë më 29 në Valbonë bashkë me mijëra qytetarë për të ndalur ndërtimin e HEC-ve që shkatërrojnë atë. Dy këngëtaret kanë lajmëruar se e njëjta protestë do të zhvillohet më 30 tetor në Tiranë.
“Mos ma prek Valbonën!”, do të jetë thirrja e kësaj proteste e organizuar si koncert me pejsëmarrjen e dy këngëtareve dhe shumë artistëve të tjerë që i janë bashkuar e pritet t’i bashkohen protestës.
Ndërkohë, kryeministri Rama nuk ka bërë asnjë hap prapa në vendimin për të ndërtuar 11 HEC-e në Valbonë. Ai justifikohet me faktin që koncesionet janë dhënë në kohën e Berishës.
