Ngjarja e mbrëmshme e ndodhur në Komisariatin nr.3, në Tiranë ku polici i patrullës së përgjithshme, Ludian Zaimi vrau me 6 plumba kolegun e tij, Çaush Saliasi, ka tronditur vendin. Pak më para janë publikuar pamjet, ku shihet se në vendngjarje janë disa efektivë policie të ulur nëpër karrige, në pritje të ndërrimit të turnit.
Mirëpo ajo që habit më shumë në pamjet e publikuara është indiferenca e efektive të tjerë të cilët në vend që të ndihmonin ose ta parandalonin fundin tragjik, u fshehën “në skuta për të mbrojtur kokën e tyre”.
Sapo kanë dëgjuar të shtënat ata janë ngritur në këmbë dhe janë fshehur, kurse disa të tjerë që ishin jashtë, janë larguar.
Ndryshe dyshohet se Zaimi ka qenë përdorues dhe shpërndarës i lëndëve narkotike dhe këtë e ka fshehur duke mos iu nënshtruar testit që është zhvilluar brenda policisë sa i përket efektivëve që mund të ishin përdorues të këtyre lëndëve. Më tej, sipas informacioneve, Zaimi ishte edhe pjesë e patronazhistëve të artisë Socialiste.
Kujtojmë që po mbrëmë një ngjarje tjetër ka ndodhur paralelisht në Kombinat, ku inspektori i policisë Lavdosh Gjyla qëlloi me armë Murteza Likën, me të cilin ndodhej në një tavolinë duke pirë alkool.
Bazuar në situatat e fundit, është mjaftë e qartë që siguria në vendin tonë është e cenuar dhe aq më tepër kur këto vepra vijnë nga personat që supozohet se janë mbështetje dhe “derë e sigurt” për qytetarët.
